<p>यो पुस्तक ख्रीष्‍टियान जगत्‌मा घटेका १०१ ओटा प्रेरक प्रसङ्गको सङ्कलन हो । इतिहासमा परमेश्‍वरले सामान्यभन्दा सामान्य मानिसहरूलाई कसरी अद्भुत रूपमा चलाउनुभयो भनेर बुझ्नका लागि यो किताबले केही ज्योति छर्ने काम गर्दछ । चकित पार्ने त्यस्ता सन्दर्भहरूको ज्ञानले तपाईंलाई पनि जीवनमा परमेश्‍वरको निम्ति केही असाधारण काम गर्ने उर्जा मिल्न सक्छ ।</p>
<p>यो किताबमा जम्माजम्मी ३६६ ओटा प्रेरक प्रसङ्ग छन् र हरेक पाठ लगभग उही आकारको छ अर्थात् २७५-३२५ ओटा शब्दले बनेको छ । हरेक दिन एउटा-एउटा पाठ पढेर एक वर्षमा सक्‍ने गरी यस पुस्तकलाई तयार पारिएको छ । हरेक पाठ मितिसित सम्बन्धित छ । भनाइको मतलब यही हो कि तपाईंले जुन दिन जुन पाठ पढ्नुहुन्छ इतिहासमा त्यही महिना र तारिखमा कुनै न कुनै घटना घटेको पाउनुहुने छ । यहाँ तपाईंले कसरी ख्रीष्‍टियान शिक्षाको नतिजास्वरूप मान्छेको मासु खाने आदिवासीहरू बद्‌लिए भन्‍ने कथादेखि कसरी अन्तरिक्ष यात्रीहरूले चन्द्रमामा प्रभु-भोज खाए भन्‍ने कथासम्म पढ्न पाउनुहुने छ ।</p>
<p>परमेश्वर सर्वव्यापी हुनुहुन्छ भने आदम र हव्वा कसरी उहाँको नजरबाट लुक्न सके ? परमेश्वर आत्मा हुनुहुन्छ भने कसरी उहाँका औँलाहरू हुन सक्छन् ? के विश्वास नगर्ने पत्नीलाई त्याग्नुपर्ने हो ? किन एस्तरको पुस्तकमा परमेश्वरको नाउँ उल्लेख भएको छैन ? पृथ्वी सदासर्वदा रहिरहन्छ वा रहँदैन ? निष्पाप हुनुभएर पनि येशूले किन बप्तिस्मा लिनुभयो ? के कसैलाई “तँ मूर्ख” भन्दैमा हामी नरकको आगोमा पर्ने जोखिममा पर्छौं ? के येशूले हामीलाई सय गुणाभन्दा बढी भौतिक आशिष् दिने प्रतिज्ञा गर्नुभएको छ ? किन येशूले ३० वर्षको उमेरमा सेवाकार्य सुरु गर्नुभयो ? के येशूमा विश्वास गर्ने कहिल्यै मर्दैन र ? पावलको शरीरमा भएको काँढो के थियो ? ख्रीष्टियानहरूले शपथ खान मिल्छ वा मिल्दैन ? घिनलाग्दा पापहरू गरेका लोत कसरी ‘धार्मिक’ हुन सक्छन् ? यस पुस्तकमा तपाईंले यीलगायत बाइबलका १५५ ओटा कठिनाइ तथा विरोधाभासको सरल व्याख्या पाउनुहुन्छ । बाइबल अध्ययन गर्नुहुँदा तपाईं यस्ता कठिनाइहरूसित जम्काभेट गर्नुभएको छ भने यो तपाईंको लागि निकै उपयोगी सामग्री हुन सक्छ ।</p>
<p>पुस्तकको नामबाटै प्रस्ट छ कि यो सभ्यता निर्माणमा ख्रीष्टियान योगदानबारे लिखित रचना हो । ख्रीष्टियान शिक्षाको नतिजास्वरूप मानव इतिहासमा अभ्यास गरिएका मनग्गे कुरीतिहरू मात्र निर्मूलन भएनन् तर सूरीतिहरू पनि स्थापना भए । धेरै समाज रूपान्तरित भएका छन् जसका लागि ख्रीष्टियान नायकहरू प्रशंसाका पात्र हुन् । पुस्तकमा भएका ५२ ओटा अध्याय चार भागमा विभाजित छन् । प्रत्येक भागमा १३/१३ ओटा अध्याय पाउनुहुने छ ।</p> <p>पहिलो भाग कुरीतिहरूको उन्मूलनसित सम्बन्धित छ । ख्रीष्टियान शिक्षाको नतिजास्वरूप सतीप्रथा, दासप्रथा, जातीयप्रथा, देवदासीप्रथा, नरबलिप्रथाजस्ता अमानवीय चलनहरू मात्र हटेर गएनन् तर धेरै देशमा बालविवाह र बहुविवाहलाई पनि कानुनी रूपमा निषेध गरिएको छ । ख्रीष्टियानहरूको प्रभावसँगै प्राचीन ग्रिक-रोमी संसारमा अभ्यास गरिने शिशु-हत्या र शिशु-त्यागजस्ता दुष्कर्महरू पनि इतिहास बनेर गए । हरेक मान्छे मूल्यवान् छ भन्नेजस्ता बाइबलीय धारणाले गर्दा मान्छेको मासु खाने अभ्यास अर्थात् नरभक्षण निर्मूलन गरियो । दक्षिण अफ्रिकामा रङ्गभेद उन्मूलनमा मण्डलीको भूमिका उल्लेखनीय रह्यो । चीनमा बालिकाहरूको खुट्टा बाँध्ने पीडादायी चलनको उन्मूलनको लागि ख्रीष्टियान मिसनरीहरू प्रशंसाका पात्र हुन् । प्राचीन रोममा खेलको नाउँमा मान्छे मार्ने अभ्यासमा ख्रीष्टियानहरूको प्रभावसँगै पूणर्विराम लागेको थियो ।</p> <p>दोस्रो भागमा सुरीतिहरूको स्थापनाबारे चर्चा गरिएको छ । अमानवीय प्रथाहरू मात्र हटेर गएका छैनन् तर मानवीय प्रथाहरू स्थापना पनि भएका छन् । शिक्षा, स्वास्थ्य, विज्ञान, कानुन, मानव अधिकारजस्ता सुरीतिहरूको स्थापना र उन्नतिका लागि ख्रीष्टियान अगुवाहरूले खेलेका भूमिका सर्वदा तारिफयोग्य छ । पाश्चात्य जगत्‌मा नारीहरूले पाएका स्वतन्त्रताबाट पूर्वीय जगत्‌का नारीहरूले पाठ सिक्दै छन् । विश्वका अधिकांश देशमा लोकतन्त्रको उदय र विकासमा बाइबलीय प्रभाव छर्लङ्ग छ । परोपकार ख्रीष्टियान जगत्‌ले संसारलाई दिएको अर्को अनमोल उपहार हो । कला, साहित्य र सङ्गीतको दुनियाँमा ख्रीष्टियान योगदान अभूतपूर्व छ । श्रमलाई सुकर्मको रूपमा स्थापित गर्ने ख्रीष्टियान नीतिशास्त्र संसारको अर्थशास्त्रमा महत्त्वपूर्ण हिस्सा बनेको छ । संसारमा सबैभन्दा व्यापक रूपमा प्रयोगमा आएको ग्रेगोरी पात्रो येशूको जन्मको प्रभावमा रचित पात्रो हो ।</p> <p>तेस्रो भागले समाजहरूको रूपान्तरणबारे सम्बोधन गर्छ । यसमा महादेश, देश, जातिहरू पहिला कस्ता थिए र येशूको सुसमाचारले प्रवेश पाएसँगै कस्ता भए भनी उल्लेख गरिएको छ । विज्ञान, प्रविधि, चिकित्सा, कला, साहित्य, सङ्गीत, रानजीति, दर्शनशास्त्र, नीतिशास्त्रसाथै व्यवसायजस्ता मनग्गे क्षेत्रमा युरोपेली ख्रीष्टियानहरूको योगदान उल्लेखनीय रहेको छ र संसार युरोपेली ख्रीष्टियान शिक्षाप्रति सधैँ ऋणी छ । अमेरिका ख्रीष्टियान मूल्य-मान्यतामा स्थापित मुलुक हो । बेलायती मूल्य-मान्यताहरू ख्रीष्टियान मूल्य-मान्यताहरू हुन् र ख्रिस्टियमतको प्रभावले नै बेलायतलाई पृथ्वीकै एक सर्वाधिक सहिष्णु र सफल देश बनायो । दक्षिण कोरियाको नाटकीय आर्थिक वृद्धिमा ख्रिस्टियमतको महत्त्वपूर्ण भूमिका रहेको छ भनी कोरियालीहरू विश्वास गर्छन् । विविध भाषा र संस्कृतिले भरिपूर्ण अस्ट्रेलियामा अस्पताल, स्कुल, विश्वविद्यालय, मण्डली, जेष्ठ नागरिक सेवा, मानव कल्याण सङ्घ-संस्था, राजनीति, चाडपर्व, विविध समाजहरूको स्थापनामा ख्रीष्टियान योगदान छर्लङ्ग छ । प्राचीन समयमा जुन रोमले २५० वर्षसम्म मण्डलीको खेदो सतावट गरेको थियो आज त्यहीँ नै संसारकै सर्वाधिक ठुलो मण्डली खडा छ । बहुईश्वरवादबाट परिवर्तित ग्रिस यसको अद्वितीय सांस्कृतिक सम्पदा, विशाल पर्यटन उद्योग, पानी जहाजको लागि प्रमुख क्षेत्रसाथै भूगोलको दृष्टिले महत्त्वपूर्ण रणनीतिक स्थानमा छ । सुसमाचारको शक्तिको नतिजास्वरूप फिजीवासीहरू मान्छेको मासु खाने जङ्गली जातिबाट मान्छेको सेवा गर्ने सभ्य जातिमा रूपान्तरित भए । ख्रीष्टियान मिसनरीहरूको योगदानसाथै बलिदानको परिणामस्वरूप आज पपुवा न्युगिनीका बासिन्दाहरू सभ्यताको खुड्किलो चढ्दै छन् । सुसमाचारले बर्बर मानिसहरूलाई पनि परिवर्तन गरी सभ्यताको मार्गमा डोर्‍याउन सक्छ भन्नाका लागि भानुआटु अर्को उत्कृष्ट उदाहरण हो । सूर्य, चन्द्रमाजस्ता विविध थोकहरूलाई पुज्ने इक्वेडरका किचा जातिमा भएको सुसमाचारको प्रभावलाई आधुनिक समयको आश्चर्यकर्म नै मानिएको छ । मान्छेको सिकार गर्ने क्रूर नागाहरूको भूमि सुसमाचारको ज्योतिद्वारा झिलिमिलि भएको छ । लुटमारको लागि कहलिएका भाइकिङ्गहरूको परिवर्तन सम्भवतः प्रभु येशू ख्रीष्टको सुसमाचारको शक्तिको सर्वोत्तम नमुना हो ।</p> <p>भाग ४ मा तपाईंले प्रभावशाली ख्रीष्टियानहरूको बारेमा पढ्न पाउनुहुन्छ । यस पाठमा प्रथम ख्रीष्टियान सम्राट् कन्स्टेन्टाइन महान्‌को बारेमा मात्र उल्लेख भएको छैन तर दोस्रो सहस्राब्दीकै सर्वाधिक प्रभावशाली व्यक्ति योहान्नेस गुटेनबर्गको बारेमा पनि उल्लेख गरिएको छ जो छापाखानाका आविष्कारक हुन् । गुरुत्वाकर्षण नियमका आविष्कारक न्युटन एकातिर वैज्ञानिक जगत्‌का महान् मानिस थिए भने अर्कोतिर परमेश्वरमाथि विश्वास गर्ने महान् मानिस । नयाँ संसार पत्ता लगाउने क्रिस्टोफर कोलम्बस दृढ सङ्कल्प र साहसका उदाहरण हुन् जसले बाइबल धर्मशास्त्रबाट सामुद्रिक यात्रा गर्ने प्रेरणा पाए । विमानजस्तो अनुपम उपहार दिने राइट दाजुभाइ बिशपका छोराहरू थिए । मार्टिन लुथरको सुधारले मध्यकालको अन्त्य गरी आधुनिक कालको आरम्भ गरायो भन्दा फरक पर्दैन । यस ग्रहमा सबैभन्दा बढी मानिसलाई सुसमाचार सुनाउने प्रचारकहरूमा महानायक बिल्ली ग्राहम, गरिबहरूका मसिह मदर टेरेसा, सर्वश्रेष्ठ नाटककार विलियम सेक्सपिएर सबै नै बाइबलबाट प्रभावित थिए । आधुनिक दर्शनशास्त्रका पिता रेने डेकार्ट आफ्नो जीवनकालभरि नै भक्त ख्रीष्टियान रहे । नोबेल शान्ति पुरस्कार विजेता तथा सामाजिक अभियन्ता मार्टिन लुथर किङ्ग जुनिएर पास्टर थिए जसले अश्वेतहरूको मताधिकार, रङ्गभेदको अन्त्य र श्रमाधिकारसाथै अन्य आधारभूत हकको लागि अगुवाइ गरे । आधुनिक मिसनका पिता विलियम केरी आधुनिक भारतीय इतिहासमा एक केन्द्रित पात्र हुन् भने नास्तिकबाट ख्रीष्टियान बनेका महानतम रक्षाशास्त्री सी.एस. लुइस ख्रीष्टियानसाथै गैरख्रिस्टियान जगत्‌का अनमोल स्रष्टा हुन् ।</p>
<p>यो ख्रीष्टियान रक्षाशास्त्रबारे लेखिएको पुस्तक हो । रक्षाशास्त्र ख्रीष्टियान ईश्वरशास्त्रको एउटा हाँगा हो जसले ख्रीष्टियान विश्वासको पक्षमा बौद्धिक रूपमा वकालत गर्दछ । चारवटा भागमा वर्गीकृत यो पुस्तकलाई थप सत्रवटा अध्यायमा विभाजन गरिएको छ । यस कृतिमा तपाईंले रक्षाशास्त्रको परिचय, बाइबल, येशू ख्रीष्ट र परमेश्वरको अस्तित्वको बारेमा पढ्न पाउनुहुन्छ । रक्षाशास्त्रबारे एउटा अध्याय समर्पित छ भने बाइबलबारे पाँचवटा अध्याय । येशूको बारेमा दशवटा अध्याय समर्पित छ भने परमेश्वरको बारेमा एउटा अध्याय ।</p> <p>पहिलो भाग रक्षाशास्त्रको परिचयमा समर्पित छ । यसमा भएको एउटै मात्र अध्यायमा रक्षाशास्त्र भनेको के हो र हामी किन यसमा संलग्न हुनुपर्छ भनी प्रस्ट पारिएको छ ।</p> <p>दोस्रो भागले बाइबलको पक्षमा वकालत गर्छ । संसारका सबै धर्मशास्त्रसाथै पुस्तकहरूभन्दा बाइबल कसरी फरक छ भनी दोस्रो अध्यायमा शानदार ढङ्गमा व्यक्त गरिएको छ । बाइबल कुनै वैज्ञानिक पाठ्यपुस्तक नभए तापनि यसमा आधुनिक समयमा पत्ता लगाइएका कतिपय वैज्ञानिक तथ्यहरूको उपलब्धता एउटा तार्किक व्यक्तिको लागि विस्मयकारी हुनैपर्छ भनी तेस्रो अध्यायमा उल्लेख गरिएको छ । चौथो अध्यायमा तपाईंले बाइबलमा अभिलिखित भविष्यवाणीहरू कसरी विस्मयकारी ढङ्गमा पूरा भए भनी देख्नुहुन्छ । के बाइबल एउटा ऐतिहासिक ग्रन्थ हो ? पाँचौँ अध्यायमा तपाईं पुरातत्त्वविद्याद्वारा फेला पारिएका कैयौँ खोजहरूसित जम्काभेट गर्नुहुने छ जसले तपाईंलाई सकारात्मक जवाफ दिन्छ । बाइबल प्राचीन समयमा लिखित ख्रीष्टियानहरूको धर्मशास्त्र भए तापनि यसले मानव-जातिको चौतर्फी पाटोमा प्रभाव पारेको छ र हामीले प्राप्त गरेका कैयौँ लाभहरू बाइबलका नतिजाहरू हुन् भनी छैटौँ अध्यायमा व्यक्त गरिएको छ ।</p> <p>तेस्रो भाग येशूको बारेमा हो । यस धरतीमा बाँचेका सबै व्यक्तिहरूमध्ये येशू कसरी र कुन-कुन क्षेत्रमा फरक हुनुहुन्छ भनी सातौँ अध्यायले छर्लङ्ग पार्छ । पुरानो करारमा अभिलिखित कैयौँ भविष्यवाणीहरू नासरतका येशूको जीवनमा पूरा भएकाले उहाँ अलौकिक व्यक्तित्व हुनुहुन्छ भनी आठौँ अध्यायले तर्क गर्छ । येशू दुष्ट र भ्रष्ट पुस्ताको बिचमा बाँच्नुभए तापनि उहाँको निष्पाप जीवन उहाँको ईश्वरत्वको साक्षी दिने अर्को प्रमाण हो भनी नवौँ अध्यायमा प्रस्ट पारिएको छ । येशू क्रूसमा मर्नुभएन भनी कतिपय मानिसहरूले दाबी गरे तापनि ऐतिहासिक दस्ताबेजहरूको अध्ययनको आधारमा उहाँको क्रुसारोहणलाई शङ्का गर्न सकिँदैन भनी दसौँ अध्यायमा छर्लङ्ग पारिएको छ । के येशू मरेकाहरूबाट पुनरुत्थान हुनुभयो ? एघारौँ अध्यायमा यस्ता तर्कहरू पेस गरिएका छन् जसलाई अध्ययन गर्दा तपाईंले आशङ्का गर्न सक्नुहुन्न । येशूले कहिल्यै ‘म परमेश्वर हुँ’ भनी सिधै आफ्नो ईश्वरत्वको दाबी नगर्नुभए तापनि उहाँका दाबीसाथै कामहरूबाट उहाँले आफ्नो ईश्वरत्वको दाबी गर्नुभएको छ भन्ने तथ्य काँचझैँ छर्लङ्ग छ भनी बार्‍हौँ अध्यायमा प्रस्ट पारिएको छ । येशूले आफ्नो ईश्वरत्वको दाबी मात्र गर्नुभएको छैन तर त्यसको लागि दरिला साक्षीहरू पनि पेस गर्नुभएको छ भनी तेर्‍हौँ अध्यायले जानकारी दिन्छ । चौधौँ अध्यायमा येशूको शिक्षाले संसारमा ल्याएका मनग्गे रूपान्तरणहरूको चर्चा गरिएको छ । अन्य परिचित धार्मिक अगुवाहरूसित येशूको तुलना गर्दा उहाँ कसरी फरक हुनुहुन्छ भनी पन्ध्रौँ अध्यायमा उल्लेख छ । येशू ख्रिस्टियमतका संस्थापक हुनुभए तापनि विभिन्न धर्महरूले उहाँको बारेमा आआफ्नै सकारात्मक दृष्टिकोण बनाएका छन् भनी सोर्‍हौँ अध्यायमा चर्चा गरिएको छ ।</p> <p>चौथो भाग परमेश्वरको विषयबारे हो । के परमेश्वर अस्तित्वमा हुनुहुन्छ ? अन्तिम अर्थात् सत्रौँ अध्यायले उहाँको अस्तित्वको पक्षमा दरिला साक्षीहरू पेस गरेको छ ।</p>